– জিদনী আন নাহিয়ার জিদান

ফ’অর ফাডিলে কেবার খুলি
গাছ তলা যাই আম ফেডাইতাম
আম ন ফাইলে গাছত উডি
ঢেইলত ব’ই হাই ফেলাইতাম

ক্ষিরত বাজি গালি ফাডিতো
তৌও হাইতাম কেঁচা আম
আম্মা হইতো দৌড়ি নে’লি
‘এহন তুই নীচে লাম’

ঢেইঙ্গা মারি বরই গাছত
হাইয়্যি বৌত মজার বরই
জুব্বা তুলি কুস্সা ফুরাই
দৌড়ি ধাইতো হইচ্চা মলই

জামগুলা হাই হষ অই যাইতো
সাদা ডেরেস ফইত্তদিন
চুলঅত ধরি আম্মা হইতো
‘আর হাবি নে হনোদিন?’

হডে গেলগই ছোডুবেলা
আর ন ফাইয়ুম হনোদিন
সুযোগ থাইলে ফিরাই লইতাম
ছোডুবেলার বেয়াগ্গিন

লেখক : পরিচালক, এডুকেশন ফান্ড ফর দ্যা ট্যালেন্টেড

  •  
  •  
  •  
  •  
  •   
  •  
  •